Bu gün Dağıstanın Baş naziri Abdulmuslim Abdulmuslimov Dərbənd şəhərinin meri Rüstəmbek Pirmaqomedov ilə birlikdə Dərbəndə işgüzar səfəri çərçivəsində Azərbaycan Dövlət Dram Teatrında aparılan yenidənqurma işlərinin gedişi ilə tanış olub.

Teatrın direktoru Firdousi Əsgərovun sözlərinə görə, bu gün çöl işləri demək olar ki, başa çatıb, daxili tamamlama işləri aparılır. O, həmçinin teatrın özünün texniki xüsusiyyətləri nəzərə alınmaqla yenidənqurma işlərinə hazırlıq zamanı Rusiyanın müxtəlif regionlarından mütəxəssislərin cəlb olunduğunu qeyd edib.

“Teatr hər zaman insanın tərbiyəsində böyük rol oynayıb. Biz səhnə sənətinə sevgi və hörməti bərpa etməliyik. İşi yüksək səviyyədə apardığınız üçün təşəkkür edirəm”, — deyə Abdulmuslim Abdulmuslimov teatr rəhbərliyinə müraciət edib.

Dərbəndin inkişafı üzrə dövlət proqramı çərçivəsində obyektin yenidənqurma işlərinə 380 milyon rubla yaxın vəsait ayrılıb.