Yaxın günlərdə Dağıstan Respublikası Hökumətinin sədri Abdulmuslim Abdulmuslimov Rusiya Mətbuatı Günü ərəfəsində R.Həmzətov adına Milli Kitabxananın 1-ci mərtəbəsində “Dağıstan” nəşriyyatının kitab mağazasının açılış mərasimində iştirak edib.

Respublikanın Baş naziri kitab nəşri sənayesinin qorunub saxlanmasının vacibliyini vurğulayıb. Onun sözlərinə görə, kitab sənayesini qorumaq ölkənin milli təhlükəsizliyini təmin etmək deməkdir. Mağazanın açılmasında məqsəd kitab məhsullarının satışı ilə məşğul olan məntəqələrin sayını artırmaqdır.

Hazırda mağaza stendlərindəki kitabların sayı 300-dən çoxdur.Nəşriyyat kitab məhsullarının satışı üçün pərakəndə satış obyektlərinin sayını daha da genişləndirməyi planlaşdırır. Qeyd edək ki, “Dağıstan” nəşriyyatı Dağıstan Respublikasının İnformasiya və Mətbuat Agentliyinin tabeliyində olan qurumdur.